"يعني ايه "لأ


من مذكرات ريس عربي مناضل

الريس اياه ايام مكان لسه في الجيش في يوم كان قاعد هوه واصحابه في الكتيبه بيلعبو كوتشينه

اوم ايه القعده احلوت وقعدو يدردشو وهما بيسمعوا الراديو

المهم بما ان الكلام ده من اربعين خمسين سنه فكل شويه يسمعوا عن

ظابط زمل في جزيرة لواك واك او فى وادي الحناكيش عمله ثوره ومسك البلد

المهم كلهم بصو لبعض وقال واحد فيهم طب ما يلا نعمل ثوره بدل ما احنا قاعدين

لا شغله ولا مشغله المهم القعده مخلصتش الا وهما محددين مجلس قيادة الثورة على

اساس الترتيب في البوله الاخيرة من اللعب.

المهم الجماعة مكدبوش خبر وطلعو العساكر من الصبح بدري على القصر وعلى الراديو

مهو مكنش لسه في تلفزيون واعلنوا بيان الثوره اللي كتبوه امبارح وحتى نسو يكتبو سبب الثوره ايه.

المهم الموضوع عدى على خير وبعد شهرين تلاته طلع جماعه من الظباط  قالو لسيادته ال ايه لازم تعين وزاره

قال بغضب ليه وانا مش مالي عينكم ولا ايه..قالو استغفر الله سعتك بس هي الليله مشيه كده.

المهم افتكر انه كان في واد عسكري اسمو برعي كان كل يومين يسجنوا عشان بيقرا جرايد في النبطشيه

بعت الريس جاب الواد برعي من السجن الحربي وبقى برعي بيه رئيس الوزاره.

المهم يومين كده وبرعي جه على ملا وشه للريس وقاله الحق يا ريس العيال بتوع الجامعه عاملين

مظاهرة…

مظاهرة!!!!يعني ايه مظاهرة يا واد يا برعي …

دول شوية عيال بيمشوا في صف زي الجنازه ويرفعوا يفط ويفضلو ينبحو في صوتهم..

وكاتبين ايه في اليفط دي يا واد يا برعي

كاتبيــن "لأ"يا افندم

لأ!!!!! يعني ايه لأ؟

بصراحة مش عارف يافندم بس لو كانت شتيمه كنا عرفناها.

الريس قعد يهرش في راسه ببلاهه وقال تفتكر مين اللى بيفهم في المعاني بتاع الكلام يا برعي

قال اكيد دكاترة اللغة العربية والصحفيين والمثقفين

قال الريس بحماس طب اجمعهوملي بسرعة عايزهم يكونو عندي اخر النهار

قال برعي مهم موجودين في السجن يا ريس

قاله اليس باستغراب "بيعملوا ايه في السجن يا برعي"

جاوب برعي :انا قولت اسجنهم لحسن سيادتك تحتجهم في حاجه كده ولا كده محدش عارف الظروف

المهم قعد الريس يسأل الجماعة عن معنى الكلمة اللعينة اللي اول مره بيسمعها

مع اني خدمت في الجيش بتاع عشرين سنه عمري ما سمعت الكلمة دي الكل بيقول تمام يافندم

واللي ما يعجبنيش بياخد تكدير وبيتسجن.

المهم من هنا من هناك قعد الجماعه يحاولو يعرفو سيادته معنى كلمة لأ معرفوش

بس في النهاية ولانه ذكي ولماح عرف ان هي حاجه مش حلوه.

المهم الريس قال لبرعي هو مفيش هنا سجن عسكري

برعي قالوا لا يافندم كان زمنا مرتاحين دلوقتي

الريس قال اومال بتكدرو الناس ازاي؟

جاوب برعي ده لازم تتعمل محاكمه ويكون في شهود وقضاه ودفاع وموال

سال الريس بعفوية والمحكمه دي والقضاه دول انا طبعاً رئيسهم زي عندنا في المحاكم العسكرية؟

يعني الجماعه دول تبعنا ولا ايه يا برعي

تردد برعي وقال اغلبهم ياريس تحت امر سيادتك بس في منهم جماعه بيقولوا بيقولوا

بيقولو ايه يا برعي؟؟ 

بيقولو لأ يا ريس………………………………………….وللمذكرات بقية